…..A ME PUPA’….
Marzo 2021
…..A ME PUPA’….
L’e n’an ca ti manchi…pupà,
chissà sa stu magün mai al pasarà,
mi par ca ti gabbi da saltar fo in ogni müment
come quanca i ti ciamava “al Vent”
cul to camion cun la guida a destra
ca sa ghera bisugn ti ghi cambiavi anca la balestra;
ogni di a masanar sas e ciment
bastava lavurar par farti cuntent!
Ti se me pupà…
e avria già dit asà,
ma nu faria caper a chi chi nu t’ha cugnusù
ca òm come te nui ni fa pu
e pudria anca scumotarghi su!
Chi t’ha incuntrà siva
un come te cul cal valiva,
e urlaria ai quattro venti
ca ti eri na persona “ d’altri tempi”!!!
Ti ghivi in gran senso di onestà, serietà e bontà,
e ie valori ca ti m’è insagnà.
Su e giù dala Val Rendena, a Campoi, al Camp
sa sirviva in viac di gera o giarun
ti navi anca in Val Nambrùn,
in Val Genova a tor bloc di granito
e Pedretti l’era bel e che servito,
sull’intermedia dal Grostè
i ti vuliva apena te,
sa i’ordinava sabbia da malta o sabbia fina
ti navi su fin in du ca rivava la telecabina
ma a forza di purtar giarun
ti se anca na in cuficun in tin buiun !
E d’invern nu l’e ca ti trigavi,
parchè anca la nef ti spalavi
e in tai invern di na bota an vigniva na…motta!!!
Nu ghera dì e nu ghera not
ti lavuravi come in tarramot,
e nu pudivan esar cuntenc cal flucava
parchè vargugn…tribulava!!
E sa nul flucava???
Nu pinsarì miga cal trigava??
Al sistemava i camion in tal garas
agli impiturava e al ghi dava al grass,
sai nava a far la revision…
sa no ieri pronti par la prossima stagion!
Quanca eru picinina
vuliva sempre star cun tec in cabina
e, tra in “buono” e in Muratti
ti “bruntulavi” cul zio Batti
a boti si farmavan al bar Augusto
e ti bivivi al to misto di gusto,
ma ti ghi mitivi in minut
e par finer la me spuma mi vigniva al sanglüt.
Da pop ti navi tuc i dì sala Cioca a peoti
po ti ghi navi cun la to famoia a far pulenta e ciupoti
e i dì di festa cun la to Rosa
parchè anca al pu gran lavoratore
ogni tant bisügn cal si riposa.
Ti piasiva anca nar par fünc….
par brisi ti mi purtavi
e a bunora ti mi svigliavi,
ma quanca vigiva numa i spazin e l’era amù not
capiva ca iera li zinc e no li ott!!
Ma ormai era dismisiada
e la caccia l’era scuminzada,
a boti nun gatavan miga
ma par te la giurnada nu la finiva…
e par “nu risparmiarti fadighi”
al cassun dala jeep di logna ti implinivi
e a mi mi vigniva già l’affan
parchè siva quanti boti l’avrian tota in man!!
Navan anca pa nus, par castogni, par sparas, par salata dai pre, par slavazoi….
……SLAVAZOI…..
vigiat ca anca la natura
la parla dal to bontà e bravura?
Ades pinsarì :” Cu disala? Ela nada di cirvel?”
….”Parchè??? Slavazoi nus dis anca ….farinei?
Adess…..pruvè a far la traduzion
di stà erba chi cros intorno al stalon….”
In talian cül pratico….
radicchio selvatico….
In talian cül antico….
….BUON ENRICO!!!
Enrico, Richeto, Nino, Ninetta,
cün diversi nom i pudiva ciamarti
ma nu cambia al modo da ricürdarti
e chi chi g’ha avù modo da frequentarti
i ti ammirava alora e i seghita a ludarti.
Da piciùla ti mi favi quasi suggezion
po ho capì ca l’era ammirazion,
bastava in to sguardo di approvazion
a darmi forza per affrontar ogni tribulazion…
se, parchè in la vita g’ho avù qualchi ostacolo
e pinsava : “Chi ghi vol in miracolo!”
ma al “miracolo”l’era averghi in punto di riferimento,
pasar cun tec qualchi momento
parlarti dal me tormento
se…insomma…affrontar l’argomento!
Gli ultim du dì
i’ho pasè apè a ti
e nu m’ho mai pintì
anzi….pinsarghi mi vida a affrontar ogni dì.
Ori e ori cun la tò man in tala mia
ha creà n’empatia….
cula man granda, grosa, calda e forte
ca ho stricà fin ala …morte
e cun cùla man, prüma dal “to viaggio”
ti m’è mandà l’ultimo messaggio,
n’altro ricordo ca purtarò in tal me cör
par alleviar stu gran dulor!
Ti se na via,
dop quindas dì t’e vignù dre anca la zia,
apena pruma di stà pandemia
ca la n’ha purtà via l’allegria,
nu pudum pu star in cumpagnia
e l’ha ruvinà salute e economia.
Di preciso in du ca ti se nu savria,
ma su sicora: in bona cümpagnia!!!!
Mi pias pinsarti a ciaciarar in allegria
a giugar a carti e bivar all’ustaria….
e sa pudos incuntrarti
gavria tanti di culi robi da cuntarti.
Quanca ti po…spia giù…
parchè a boti ni par da nu fargala pü
ma sa ti riesci a darni in po’ di forza
forsi la speranza nu la si smorza.
L’e n’an ca ti manchi püpà…
ma nu m’ho gnamù abituà….
al magün nu l’e pasà!
….. la to Dany
